صراع الاجيال و الدفاع عن ثقافتنا كشباب... ارجو التثبيت

[F3lool]

ا السلام عليكم

شباب صباح الخير

في جمله نحنا بنسمعها كتير

اولاد الزمن دا و عيال الزمن دا


انا جد ما عارف ليه بتقال كدا و ما عارف اولاد الزمن دا مشكلتهم شنو عشان إتقال فيهم البتقال دا ؟

الناس القدامنا عندهم راي في اي حاجه بنعملها نحنا و طبعآ عندهم معتقداتهم و فهمهم للنقطه دي , بس مبنيه على اي اساس الله اعلم , إذا لقو مثلا واحد من الشباب لابس شورت يقولو بالله عاين الود دا حايم كيف , مع إنو الزول البقول الكلام دا في سنة كم و ستين و لا كم و سبعين كان بمشي المدرسه بشورت (و دموريه كمان) برضو ,و إذا لقو واحد مطول شعرو مثلآ او شايل سجاره يقولو الود دا قليل ادب مع إنو هو لمن كان في سن الود دا كان شعرو (تفه قدر القفه) و كان (بشلع) يعني بسكر و الامثال كتيره.
دي ما النقطه المقصوده طبعآ لاكن في إعتراض علينا كشباب في مختلف المجالات سواء كانت إجتماعيه او فنيه او رياضيه او او او او ...........
انا حا اوريكم عينة من كلام اهلنا الله يديهم العافيه
مقاطع من مقال للاستاذ الفاتح يوسف جبرا

(الوطن) 2030م

فى صباح أحد أيام أبريل من عام 2030 وفى إحدى الفلل المتواضعه بضاحية (قاردن سيتى الجديده) كان هذا الحوار يتم بين (ميرا) ذات الخمسة عشر ربيعا وجدتها (شيراز)

ميرا : إنتى مالك يا (حبوبه) الليله زهجانه كده؟
الجدة: الما بزهجنى شنو؟ الواحدة ما عندها أى برنامج تعملو ولا أى حاجه تتسلى
بيها
ميرا: طيب ما تفتحى (الدش) إحتمال تلاقى ليكى فيلم (آكشن) وإلا (فديو كلبات)
تعجبك
الجدة: التليفزيون بقى ممل خالص مافيهو غير 8900 قناة بس!.وبعدين الريسيفرات
الجديده دى أنا ما بعرف أشغلا
ميرا تحاول أن تداعب جدتها وتخرجها من جو الكآبه :
ميرا : يا سلام يا (تيته) البنطلون الجينز والبلوزة (البودى) دى عليكى تجنن .. حاجه
ظريفة وكدة – مواصلة – لكن البنطلون ده مش محذق شوية ياتيته؟ هسع
ما بضايقك ؟؟
الجده : يضايقنى دى شنو ؟ ده هو ده اللبس المحتشم المفروض أى واحده تلبسو
وتحافظ عليهو - فى تنهد – وين أيام زمان أيام (المشروع الحضارى) لما كنا
نلبس فى (الحفلات) وبيوت الأعراس (البنطلون) الجينز والبلوزة (القصيرة)
والواحده فينا ماشة (نانسى عجرم) كده وبطنها (كاشفه) و(صرتا ) بره … يا
سلام كنا بنات آخر إحتشام مش ذيكم هسع !!

شوفو الكاتب دا خيالوا (الفارغ) و داهو لي سنة كم و كلامو كيف
لا و تعالو ا نشوف جزء تاني من المقال بتاع الكاتب (الظريف) دا

الجدة: أقول ليكى شنو وإلا شنو يا بتى؟؟ .. زمان كنا بنسمع الغناء الراقى الجميل
لى فنانين ليهم وزنهم جمال فرفور ، نادر خضر، طه سليمان ، ندى القلعة –
مواصلة فى تحسر- غناء يعنى غناء مش أى كلام ذى هسع الأغنية كانت
تستمر أكتر من خمسة دقايق مش (نص دقيقة) ذى الغناء بتاعكم الهسع
ده !! وبعدين كنا نسمع الغنا ده على حاجة اسمها MP3 هسع إنقرضت
وما موجوده لكن كان الغناء لمن تسمعيهو بيها عندو طعم - مواصلة فى
تحسر - يا سلام لما كانت الواحده فينا تخت الـ MP3 فى (حزام) البنطلون
(الجينز) وتكون قاعده (مجكسة فى الكافتيريا) يا سلاااام كانت أيام

و يجي الظريف تاني و يتكلم عن الفنانين الشباب و يواصل إنتقاداتو الما مبرره
و نحنا بنفخر بالجيل القبلنا و بنسمع لكل العمالقه من كرومه و سرور
مرورآ بالكاشف و عثمان حسين و وردي و ابو الامين و زيدان و غيرهم من الكبار .

بس هم ماسكين في الاغنيه الهابطه (إنتو كلمات اغانيكم هابطه ) و ديل اسي فنانين؟ و و و ....
مع إنو الاغنيه الهابطه كانت موجوده في زمنهم .

كلماتنا هابطه ليه؟ لانو الشعراء القدام ما بدو كلمات لفنانين شباب خوفآ من الإنتقادات و انا حا اضرب ليكم مثل حي
استاذنا اسحاق الحلنقي شاعر كبير وغني عن التعريف و إتغنو باشعارو عمالقه
جمال فرفور اخد منو اغنية ما مشكله
تخيلو إنو الاغنيه دي اداها لوردي مثلآ او محمد الامين كيف ستكون ردة الفعل ؟
انا لا اقلل من قيمة الاستاذ فرفور فهو من العمالقه و لا غبار عليه .

وفي كلام بتردد في مختلف و سائل الإعلام لماذا الاغنيه السودانيه غير معروفه للعالم العربي و الغريب في الموضوع هذا السؤال يوجه للشباب الما عاجبنهم ديل .
و لما طه سليمان يجي إنزل فيديو كلب هم اول المنتقدين !!!!
حتى لو ما ارتقى للمطلوب فهي محاوله و يستحق التصفيق عليها و التشجيع.

انا شايف إنو كل العصور فيها السمح و الشين

و في رائي إنو كلو سوداني قادر على الإبداع في إذا

وجد الظروف الملائمه

ما شرط إبدع في زمن اخونا الظريف و زمن الناس القدام

ديل اولاد الزمن دا

زمن الإنترنت انا ما عارف إمكن الإنترنت دا برضو إمكن يكون حاجه كعبه , و برضو بستخدموه
فالفكره بسيطه الكلام كلو إعتراض على الشباب .

يعيبون زماننا و العيب فيهم و ما لزماننا عيب سواهم

طيب إذا نحنا اقتنعنا و قلنا نحنا اسؤا من كدا في اسئله كتيره

هل هي مشكلتنا إنو جينا في الزمن دا؟

و من الذي مفترض ان يوجهنا ؟


هذا رائي و انا اموت قهرآ عند سماع هذه العبارات
و ساظل اموت في الايام و الشهور و السنين القادمه إلى ان اموت

و انا اتقبل النقد

و لكم الراي

و جزاكم الله خيرآ

[محمد حسنين]

موضوع مهم . صراع الاجيال يحدث عند نسيان الاصل و التمسك بالفروع و هي صفة نفاق بالمقام الاول . علي سبيل المثال , تجريم السرقة مبدا فكري و تختلف طرق السرقة و مكافحتها مع الزمن . تجريم الوساطة مبدا فكري و اساليبها تختلف من زمن لزمن . مبدا الفن فيمة و تختلف طرقه من زمن لزمن . اذا ما اعترض جيل علي جيل اخر لمخالفة المبادئ الفكرية- بغير حجة- فهي تصب في باب التقويم . و ان كانت في غير ذلك صبت في باب فرض الوصاية و التخلف . و بالنسبة لكاتب الموضوع الذي ذكرته فهو منطقي بغير تعصب . هناك انحدار شديد في القيم لم يبدا عند هذا الجيل و لا في الجيل الذي جاء به . و هي قيم اساسية قبل الشكليات . ليس الامر في لبس شورت او بنطلون بل هو في القياس , بلغة اسهل فان هناك قيمة تسمي ثياب فرض للرجل و المراة شرعيا . لم يحدد الشرع نوع الثياب و لا شكلها بل طلب بان تحقق هذا المبدا فقط بغير زيادة و لا نفصان . اذا ما كان الشورت يحقق ذلك فمرحبا به . و اذا ما اراد احد ان يخالف فلياتي بحجة و ليناقش بحجة , و الغلبة للاصوب . التطور ياتي من هذا الباب و التخلف يزيد عند غلق هذا الباب . و ما يجري حاليا هو بعيد تماما عن التطور بل هو تخلف فكري و ان تظاهر بالعصرية . من يتم تقليدهم من اجانب يحملون فكرا و ما يفعلون هو تعبير عن هذا الفكر . و العيب ليس في الفعل بل في ارتضاء التقليد بغير حجة . من كان يؤمن بما يفعل فلن يهمه كثيرا الهجوم - او النقد - الا ممنطق . و ان نوقش بحجة سمعها و رد بما راه . و الاجمل هو الخضوع لما يراه هو صوابا سواء كان لديه او مع الاخرين . اعتذر عن الاطالة و لكن موضوعك شيق :icon_lol: احييك عليه و شكرا جزيلا علي الموضوع .

[a7la 3yoon]

مشكووووووور اخي فعلول على الموضوع الجميل

[F3lool]

صح لسانك اخوي محمد


و مشكوره احلى عيون على المرور

[سيدة الاقمار]

F3lool لك التحية على الموضوع المهم جدا جدا جدا جدا

و لهذا لي عودة قويه للنقاش فيه .....

[tamy]

شوفوا يا جماعه صراع الاجيال كان طول عمره موجود . بالتأكيد انه ازداد حدة في زمنا ولكن لاسباب منها الانترنت والفضائيات او باختصار لان الفرد بقى ليه امكانيه الوصول والتواصل مع ثقافه الغير بمنتهى السهوله او لان العالم بقى قريه صغيرة كما يطلق عليه البعض ولان بالطبع الثقافه التي لها التأثير الاكبر على الشباب هي الثقافه الغربيه او الامريكيه يالتحديد فانه لما لهذة الثقافه من معتقدات او مظاهر تتناقض وبشدة مع مجتماعتنا العربيه والاسلاميه ومع انجذاب بعض الشباب لهذة الظواهر بشدة فانه تزداد حدة انتقاضات الاجيال السابقه لنا ليس من اجل الانتقاد فقط انما في محاوله يائسه للحفاظ ولو على جزء بسيط من اسلاميتنا و عربيتنا



وشكرا

[F3lool]

3lool لك التحية على الموضوع المهم جدا جدا جدا جدا

و لهذا لي عودة قويه للنقاش فيه .....
ــــــــــــــــــــــــــــــــــــــــــــــــــ ــــــ
تسلمي يا سيدة و نتمنى هذه العوده القويه منك و من كل الشباب

[F3lool]

تامي مشكور وجهة نظرك الجميله

[سيدة الاقمار]

نفس المضمون ...

المجتمع السوداني ما بين ماضي وارث تليد وحاضر مشوه بثقافة ممسوخة
http://vb.sudanson.com/showthread.php?t=703

صراع الاجيال .. كل يغنى على ليلاه
http://vb.sudanson.com/archive/index.php/t-15676.html